الشاعر عبد الله بن ربيعة ( بحث + نماذج من شعره )

التعريف بالشاعر :

اسمه : عبد الله بن محمّد بن وطبان بن ربيعة مرخان بن إبراهيم بن موسى بن ربيعة بن مانع بن ربيعة المريدي

نسبه : يرجع نسب الشاعر إلى بيت من اعرق بيوت العرب المعاصرة في الحكم و الرئاسة حيث يلتقي بآل سعود ملوك المملكة العربيّة السعودية في جدّهم " إبراهيم بن موسى " حاكم الدرعية

و فاته :

توفي في رمضان سنة 1273هـ " يعني بعدها بميّة سنة تماماً توفي موحد المملكة العربية السعودية الملك عبد العزيز رحمة الله عليه ... عاش تقريباً حوالي 70 سنة

من عيون شعر عبد الله بن ربيعة :

فحولة :

هذا الفحل واجد فحول الحريما = الفحل من يلقح بالاريا معاقيم

إن مع العسر يسر :

لا بد للعسر المنوّخ مياسير = و لا بد ما تقفا النذارة بشارة

راحة المجانين :

المستريح اللي من العقل مجذوب = و إن شفت لك عاقل ترى الهم دابه

الطبع غلاّب :

إن كان ما طبع المراجل رسيما = الطبع يسبق ما تفيد التعاليم

منظر خادع :

رجمٍ تشوفه بالمتاييه باني = لا ترتجي منه المعزّه و لا العون

خيبة :

وجدي عليها وجد من كايد الزرع = يوم استتم اليا الدبا فيه شرّع

كشف طبّي :

قال الطبيب اش تشتهي قلت لاما = عجّاب لعّابٍ ورا نايف هضاب

شيمة:

من عافنا ماهو لنا راس مالا = و من باعنا بالدون بيعناه بخلال

متناقضات:

علقم عسل ابكم فصيح اللساني = مبهم بريم الراي شاطن و مشطون

و قت الرخى ذبّاح حيلٍ سماني = ووقت الوغى تلقاه طاعن و مطعون

في بروجٍ مشيّدة :

العبد ما له عن حتوف المقادير = اللي كتب لو هو بصندوق زاره

بعض قصائده :

ليتك دريت بما جرى لي يابن زرع = من جادلٍ بين المجابيب فرّع
توّه صغير السن ما عالج الصرع = لا شك في قتل المشقّى تبرّع
وجدي عليها وجد من كايد الزرع = اليا استتمّ اليا الدبا فيه شرّع
أو وجد راعي هجمةٍ بالخلا ترع = صبّح و صيّب و شيل معهم مدرّع
أو وجد مدميٍّ قضى حاكم الشرع = عليه ما جرّع خصيمه يُجرّع
لا وا على يا منزل الدرّ بالضرع = ظامي حشى ما بين اشافيه شرّع
واسلم و لا فاجاك فالي يابن زرع = من جادلٍ بين المجابيب فرّع

.............

حمام ياللي على مرقاب = ذا النوحِ يا شينِ وش بابه..؟
يالورقِ ليتك تسدّ الباب = ليتك ترى وش حنّا به
ذاك الطرب يا قميري غاب = صرف النيا دارِ دولابه
تدري ايا ورقِ راسي شاب = كلّه من الغي و اسبابه
يا زيدِ راعي الهوى لو تاب = مشطونِ قلبه مع احبابه
يا زيدِ شوقي نزيه ثياب = اموتِ يا زيدِ و احيا به
من غرقة النوم افزّ انواب = يا ليت من لا تمعنى به
عالجتِ جرح الهوى ما طاب = و دواي يا زيدِ بعْذابه
ودّبت في ساقته اجناب = بيطارة الفنِّ لعّابه
بالبابِ شالت لها جلباب = قالت مسا الخيرِ باحبابه
لا باسِ يابو ثمان عْذاب = الله يعينك على اطلابه
حوريّ دارٍ بها نعّاب = يا حيِّ صوته و ما جابه
له قلتِ من ذا الذي لك جاب = قال المقاديرِ غلاّبه
كوني ضحى من ورا ذا الباب = ريمٍ رماني بنشّابه
مالونِ يا راعي النبناب = ما خفتِ مولاكِ و حسابه
يا زينِ يوم الكرى لك طاب = طيب الكرى ما تهنّى به
صدّت و قالت لها أقلاب = أثر الخبر ذاك ما ثابه
أنا احسبه من قبل عجّاب = و امّ المسابيحِ كذّابه
قولي لمن رامها تعّاب = الله يضفّي لنا احجابه
قالت من الله عليك حجاب = الصلحِ لا بدِّ نسعى به

.................

و هنّاك الكثير جدّاً من القصائد للشاعر عبد الله و القصص و نقائضه مع الشاعر محمّد بن لعبون راح اتطرّق إن شاء الله لها في مواضيع قادمة

المصدر :

للباحث ابراهيم الخالدي